ಅಂಬಾನಿ ಮದುವೆಗೆ ಬಂದ WWE ಜಾನ್ ಸೆನಾ

ಮುಂಬೈ: ರಿಲಯನ್ಸ್‌ ಇಂಡಸ್ಟ್ರೀಸ್‌ ಮುಖ್ಯಸ್ಥ ಮುಖೇಶ್ ಅಂಬಾನಿ ಏಷ್ಯಾದ ಅತ್ಯಂತ ಶ್ರೀಮಂತ ವ್ಯಕ್ತಿಗಳಲ್ಲೊಬ್ಬರು. ಇಂದು ಮುಖೇಶ್‌ ಅಂಬಾನಿ ಹಾಗೂ ನೀತಾ ಅಂಬಾನಿ ಕಿರಿಯ ಪುತ್ರ ಅನಂತ್‌ ಅಂಬಾನಿ ಹಾಗೂ ರಾಧಿಕಾ ಮರ್ಚೆಂಟ್‌ ವೈವಾಹಿಕ ಜೀವನಕ್ಕೆ ಕಾಲಿಡಲು ಸಜ್ಜಾಗಿದ್ದಾರೆ. ಇಂದು ಸಂಜೆಯಿಂದಲೇ ಅನಂತ್​ ಅಂಬಾನಿ ಹಾಗೂ ರಾಧಿಕಾ ಮದುವೆಯ ಮೆರವಣಿಗೆ ಆರಂಭಗೊಂಡಿದೆ.
ಈಗಾಗಲೇ ಮುಖೇಶ್​ ಅಂಬಾನಿ ಅವರ ಪುತ್ರ ಅನಂತ್ ಅಂಬಾನಿ ಮದುವೆಗೆ ದೇಶ, ವಿದೇಶಗಳಿಂದ ಗಣ್ಯರು ಮುಂಬೈಗೆ ಆಗಮಿಸುತ್ತಿದ್ದಾರೆ. ಜಾಗತಿಕ ಕಂಪನಿಗಳ ಎಂಡಿ, ಸಿಇಓಗಳು ಕೂಡ ಆಗಮನವಾಗಿದೆ. ಟೋನಿ ಬ್ಲೇರ್, ಬೋರಿಸ್ ಜಾನ್ಸನ್, ಜಾನ್ ಕೆರಿ, ಕಿಮ್ ಕರ್ದಿಶಾನಾ, ಸಲ್ಮಾನ್ ಖಾನ್, ಸಿದ್ಧಾರ್ಥ್ ಮಲ್ಹೋತ್ರಾ ಮತ್ತು ಕಿಯಾರಾ ಅಡ್ವಾಣಿ, ಆಂಧ್ರದ ಡಿಸಿಎಂ ಪವನ್ ಕಲ್ಯಾಣ್, ರಾಮಚರಣ್, ನಟ ಯಶ್​ ಹಾಗೂ ರಾಧಿಕಾ ಪಂಡಿತ್​, ಸಿಎಂ ಮಮತಾ ಬ್ಯಾನರ್ಜಿ, ಲಾಲೂ ಪ್ರಸಾದ್ ಯಾದವ್ ಕುಟುಂಬ, ಕಿಮ್ ಕರ್ದಾಶಿಯಾನ್ ಮತ್ತು ಕ್ಲೋಯ್ ಕಾರ್ಡಶಿಯಾನ್, ಪ್ರಿಯಾಂಕಾ ಚೋಪ್ರಾ, ನೆಕ್ ಜೋನ್ಸ್ ದಂಪತಿ, ಐಶ್ವರ್ಯಾ ರೈ-ಬಚ್ಚನ್, ಜಾನ್ವಿ ಕಪೂರ್ ಮತ್ತು ಸಾರಾ ಅಲಿ ಖಾನ್ ಸೇರಿದಂತೆ ಸಾಕಷ್ಟು ಗಣ್ಯರು ಮದುವೆಗೆ ಆಗಮಿಸಿದ್ದಾರೆ.
ಇನ್ನು, ಡಬ್ಲ್ಯುಡಬ್ಲ್ಯುಇ (WWE) ಐಕಾನ್, 16 ಬಾರಿ ಚಾಂಪಿಯನ್ ಪಟ್ಟ ಅಲಂಕರಿಸಿದ್ದ ಲೆಜೆಂಡರಿ ಜಾನ್ ಸೆನಾ ಅವರು ಅನಂತ್ ಅಂಬಾನಿ ಹಾಗೂ ರಾಧಿಕಾ ಮದುವೆಗಾಗಿ ಮುಂಬೈಗೆ ಆಗಮಿಸಿದ್ದಾರೆ. ಇಂದು ಮಧ್ಯಾಹ್ನ ಮುಂಬೈಗೆ ಆಗಮಿಸಿದ ಜಾನ್ ಸೆನಾ ಅವರನ್ನು ಸಂಭ್ರಮದಿಂದ ಬರಮಾಡಿಕೊಳ್ಳಲಾಯಿತು. ಬೂದು ಬಣ್ಣದ ಟೀ ಶರ್ಟ್, ಟ್ಯಾನ್ ಶಾರ್ಟ್ಸ್ ಮತ್ತು ಕ್ಯಾಪ್ ಧರಿಸಿಕೊಂಡು ಬಂದಿದ್ದ ಜಾನ್ ಸೆನಾ ಅವರನ್ನು ನೋಡಿದ ಪಾಪರಾಜಿಗಳು ಜೋರಾಗಿ ಕೂಗಾಡ ತೊಡಗಿದರು.