ಪೊಲೀಸರ ಮುಂದೆಯೇ ಮಾರಾಮಾರಿ: ಜಗಳ ಬಿಡಿಸಲು ಪೊಲೀಸರ ಪರದಾಟ

ಚಿಕ್ಕಬಳ್ಳಾಪುರ: ಮಹಿಳೆಯರು, ಪುರುಷರು ಸಿನಿಮೀಯ ರೀತಿಯಲ್ಲಿ ಹಿಗ್ಗಾಮುಗ್ಗ ಹೊಡೆದಾಡಿಕೊಂಡಿದ್ದಾರೆ. ಜಮೀನಿನಲ್ಲಿ ಹೊಡೆದಾಡಿಕೊಂಡ ಒಂದೇ ಕುಟುಂಬದ ಸದಸ್ಯರು ಕೈಗೆ ಸಿಕ್ಕ ಕಲ್ಲು, ಮಣ್ಣು ಗಿಡಗಳಿಂದ ಬಡಿದಾಡಿಕೊಂಡಿದ್ದಾರೆ.
ಇದು ನಿಜಕ್ಕೂ ಯಾವ ಸಿನಿಮಾ ಫೈಟಿಂಗ್‌ ಸೀನ್‌ಗಿಂತಲೂ ಕಮ್ಮಿ ಇಲ್ಲ. ಇವರ ಮಾರಾಮಾರಿ, ಹೊಡೆದಾಟ ನೋಡಿದ ಪೊಲೀಸರೇ ಸುಸ್ತಾಗಿ ಹೋಗಿದ್ದಾರೆ. ಒಂದೇ ಕುಟುಂಬಸ್ಥರ ಜಗಳ ಬಿಡಿಸಲು ಪಾಪ ಪೊಲೀಸರೇ ಪರದಾಡಿದ್ದಾರೆ.
ಚಿಕ್ಕಬಳ್ಳಾಪುರ ತಾಲ್ಲೂಕಿನ ಮೋಟ್ಲೂರು ಗ್ರಾಮದಲ್ಲಿ. ಜಮೀನು ವಿಭಾಗ ವಿಚಾರವಾಗಿ ಒಂದೇ ಕುಟುಂಬಸ್ಥರ ನಡುವೆ ಜಗಳ ನಡೆದಿದೆ. ಮೋಟ್ಲೂರು ಗ್ರಾಮದ ಚೌಡಮ್ಮ ಹೆಸರಲ್ಲಿದ್ದ 2.17 ಗುಂಟೆ ಜಮೀನು ಇತ್ತು. ಈ ಜಾಗ ಚೌಡಮ್ಮ, ನಾಗಪ್ಪ, ಮುನಿಅಕ್ಕಯಮ್ಮನಿಗೂ ಸೇರಬೇಕಾಗಿದೆ. ಚೌಡಮ್ಮ ಸುಮಾರು ನಲವತ್ತು ವರ್ಷಗಳಿಂದ ಒಡಹುಟ್ಟಿದವರಿಗೆ ಜಮೀನು ನೀಡದೇ ಸತಾಯಿಸಿದ್ದರಂತೆ. ಹೀಗಾಗಿ ಚೌಡಮ್ಮ ವಿರುದ್ಧ ಚೌಡಪ್ಪ ,ನಾಗಮ್ಮ ಮುನಿಅಕ್ಕಯಮ್ಮ ಕುಟುಂಬಸ್ಥರು ತಿರುಗಿಬಿದ್ದಿದ್ದಾರೆ.
ಜಮೀನಿಗಾಗಿ ಕುಟುಂಬಸ್ಥರ ಮಧ್ಯೆ ಮಾತಿಗೆ ಮಾತು ಬೆಳೆದು ಕೈ, ಕೈ ಮಿಲಾಯಿಸಿ ಗಲಾಟೆ ಮಾಡಿಕೊಂಡಿದ್ದಾರೆ. ಈ ವಿಚಾರ ತಿಳಿದ ಪೊಲೀಸರು ಸ್ಥಳಕ್ಕೆ ಆಗಮಿಸಿದ್ದು ಹೊಡೆದಾಟ ಬಿಡಿಸಲು ಪ್ರಯತ್ನಿಸಿದ್ದಾರೆ. ಆದರೆ ಗಲಾಟೆಯಲ್ಲಿ ಕೆಲವರಿಗೆ ಗಂಭೀರ ಗಾಯಗಳಾಗಿ ಸರ್ಕಾರಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಚಿಕ್ಕಬಳ್ಳಾಪುರ ಗ್ರಾಮಾಂತರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಈ ಘಟನೆ ನಡೆದಿದೆ.