ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನಲ್ಲಿ ಬಾಲ್ ಟ್ಯಾಂಪರಿಂಗ್…!

ಲಂಡನ್‌: ಐಸಿಸಿ ಟೆಸ್ಟ್‌ ವಿಶ್ವ ಚಾಂಪಿಯನ್‌ಷಿಪ್‌ ಟೂರ್ನಿಯ ಫೈನಲ್‌ ಪಂದ್ಯದಲ್ಲಿ ಟೀಮ್ ಇಂಡಿಯಾ ಎದುರು ಆಸ್ಟ್ರೇಲಿಯಾ ತಂಡ ಮೋಸದ ಆಟವಾಡಿದೆ ಎಂದು ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಬಸಿತ್‌ ಅಲಿ ಗಂಭೀರ ಆರೋಪ ಮಾಡಿದ್ದಾರೆ. ಭಾರತ ತಂಡದ ಪ್ರಮುಖ ಬ್ಯಾಟರ್‌ಗಳಾದ ಶುಭಮನ್ ಗಿಲ್‌, ಚೇತೇಶ್ವರ್‌ ಪೂಜಾರ ಮತ್ತು ವಿರಾಟ್‌ ಕೊಹ್ಲಿ ಅವರನ್ನು ಔಟ್‌ ಮಾಡಲು ಪ್ಯಾಟ್‌ ಕಮಿನ್ಸ್‌ ಸಾರಥ್ಯದ ಆಸ್ಟ್ರೇಲಿಯಾ ತಂಡ ಬಾಲ್‌ ಟ್ಯಾಂಪರಿಂಗ್‌ ನಡೆಸಿದ ಎಂದು ಅಲಿ ಹೇಳಿದ್ದಾರೆ.
ಪಾಕಿಸ್ತಾನ ಕ್ರಿಕೆಟ್‌ ತಂಡದ ಪರ 19 ಟೆಸ್ಟ್‌ ಮತ್ತು 50 ಒಡಿಐ ಪಂದ್ಯಗಳನ್ನು ಆಡಿರುವ ಬಸಿತ್ ಅಲಿ ಪ್ರಕಾರ, ಆಸ್ಟ್ರೇಲಿಯಾ ತಂಡ ಇನಿಂಗ್ಸ್‌ನ 15ನೇ ಓವರ್‌ನಲ್ಲಿ ಚೆಂಡಿನ ಸ್ವರೂಪ ತಿರುಚುವ ಮೂಲಕ ವಿರಾಟ್‌ ಕೊಹ್ಲಿ ಮತ್ತು ಚೇತೇಶ್ವರ್‌ ಪೂಜಾರ ವಿಕೆಟ್‌ ಪಡೆಯಿತು ಎಂದು ಆಸೀಸ್‌ ತಂಡದ ಮೋಸದ ಆಟದ ಕಡೆಗೆ ಬೆಳಕು ಚೆಲ್ಲಿದ್ದಾರೆ. ಇದರಿಂದ ಎರಡನೇ ದಿನದಾಟದ ಅಂತಿಮ ಅವಧಿಯಲ್ಲಿ ಭಾರತ ತಂಡ ಸತತ ವಿಕೆಟ್‌ ಕಳೆದುಕೊಂಡು ಅಪಾಯಕ್ಕಿ ಸಿಲುಕಿತು ಎಂದಿದ್ದಾರೆ.
14ನೇ ಓವರ್‌ನ ಕೊನೇ ಎಸೆತದಲ್ಲಿ ವೇಗಿ ಕ್ಯಾಮೆರಾನ್ ಗ್ರೀನ್ ಎದುರು ವೆಲ್‌ ಲೆಫ್ಟ್‌ ಮಾಡುವ ಪ್ರಯತ್ನದಲ್ಲಿ ಚೇತೇಶ್ವರ್ ಪೂಜಾರ (14) ಕ್ಲೀನ್‌ ಬೌಲ್ಡ್‌ ಆದರು. ಅವರ ಅಂದಾಜಿಗಿಂತಲೂ ಚೆಂಡು ಹೆಚ್ಚು ಒಳಗೆ ನುಗ್ಗಿಬಂದು ಆಫ್‌ಸ್ಟಂಪ್‌ಗೆ ಬಡಿದಿತ್ತು. ಬಳಿಕ 19ನೇ ಓವರ್‌ನಲ್ಲಿ ಎಡಗೈ ವೇಗಿ ಮಿಚೆಲ್‌ ಸ್ಟಾರ್ಕ್ ಎಸೆದ ಮಾರಕ ಬೌನ್ಸರ್‌ನಲ್ಲಿ ಸ್ಲಿಪ್ ಫೀಲ್ಡರ್‌ ಸ್ಟೀವ್‌ ಸ್ಮಿತ್‌ಗೆ ಕ್ಯಾಚ್‌ ಒಪ್ಪಿಸಿದ ವಿರಾಟ್‌ ಕೊಹ್ಲಿ (14) ನಿರಾಶೆಯಿಂದ ಪೆವಿಲಿಯನ್ ಸೇರಿದರು.
ಯಾರೊಬ್ಬರೂ ಬಾಲ್‌ ಟ್ಯಾಂಪರಿಂಗ್ ಗಮನಿಸಿಲ್ಲ!
ವಿಡಿಯೋ ಒಂದರಲ್ಲಿ ಆಸ್ಟ್ರೇಲಿಯಾ ಆಟಗಾರರು ಚೆಂಡಿಗೆ ಹೊಳಪು ತರಲು ಅಥವಾ ಒಂದು ಬದಿಯ ಹೊಳಪನ್ನು ತೆಗೆಯುವ ಸಲುವಾಗಿ ಕೈಗೆ ಹಾಕಿಕೊಂಡಿರುವ ಕ್ರೇಪ್ ಬ್ಯಾಂಡೇಜ್‌ ಬಳಕೆ ಮಾಡುತ್ತಿರುವುದು ಸ್ಪಷ್ಟವಾಗಿದೆ. ನಿಯಮಗಳ ಪ್ರಕಾರ ಚೆಂಡನ್ನು ಬಟ್ಟೆ ಹೊರತಾಗಿ ಬೇರೆ ಯಾವ ವಸ್ತುವಿನಿಂದಲೂ ಉಜ್ಜುವಂತ್ತಿಲ್ಲ. ಆದರೆ, ಆಸೀಸ್‌ ಆಟಗಾರರು ಬ್ಯಾಡೇಜ್‌ ಮೂಲಕ ಚೆಂಡನ್ನು ಉಜ್ಜುತ್ತಿದ್ದರೂ, ಆನ್‌ಫೀಲ್ಡ್‌ ಅಂಪೈರ್ಸ್‌, ಪಂದ್ಯದ ಅಧಿಕಾರಿಗಳು ಮತ್ತು ಕಾಮೆಂಟೇಟರ್ಸ್‌ ಗಮನಿಸದೇ ಇರುವುದು ಅಚ್ಚರಿ ತಂದಿದೆ ಎಂದು ಬಸಿತ್‌ ಅಲಿ ಹೇಳಿದ್ದಾರೆ.
“ಮೊದಲಿಗೆ ನಾನು ಕಾಮೆಂಟರಿ ಬಾಕ್ಸ್‌ನಲ್ಲಿ ಕುಳಿತವರಿಗೆ ಮತ್ತು ಅಂಪೈರ್‌ಗಳಿಗೆ ಚಪ್ಪಾಳೆ ಹೊಡೆಯಲು ಬಯಸುತ್ತೇನೆ. ಏಕೆಂದರೆ ಆಸ್ಟ್ರೇಲಿಯಾ ತಂಡ ಇಲ್ಲಿ ಬಾಲ್‌ ಟ್ಯಾಂಪರಿಂಗ್‌ ನಡೆಸಿರುವುದು ಸ್ಪಷ್ಟವಾಗಿದೆ. ಆದರೆ ಯಾರೊಬ್ಬರು ಈ ಬಗ್ಗೆ ಮಾತನಾಡುತ್ತಿಲ್ಲ. ಬ್ಯಾಟ್ಸ್‌ಮನ್‌ಗಳು ಕೂಡ ಅಚ್ಚರಿ ಪಡಲಿಲ್ಲ. ಅಲ್ಲೇನಾಗುತ್ತಿದೆ ಎಂಬುದನ್ನು ಅರ್ಥ ಮಾಡಿಕೊಳ್ಳಲಿಲ್ಲ. ಇದಕ್ಕೆ ಉತ್ತಮ ಉದಾಹರಣೆ ಎಂದರೆ ಆಫ್‌ ಸ್ಟಂಪ್‌ನಿಂದ ಆಚೆಯಿದ್ದ ಚೆಂಡನ್ನು ಬಿಟ್ಟರೂ ಚೆಂಡು ಸ್ಟಂಪ್ಸ್‌ಗೆ ಬಡಿದಿರುವುದು. ಇನ್ನು ವಿವರವಾಗಿ ಹೇಳುವುದಾದರೆ, ಟೀಮ್ ಇಂಡಿಯಾ ಬೌಲಿಂಗ್‌ ಮಾಡುವಾಗ 54ನೇ ಓವರ್‌ವರೆಗೂ ಶಮಿ ಎಸೆದ ಎಸೆತಗಳಲ್ಲಿ ಹೊಳಪು ಹೊರಗಿದ್ದಾಗ ಚೆಂಡು ಸ್ಟೀವ್ ಸ್ಮಿತ್‌ಗೆ ಆಚೆ ಹೋಗುತ್ತಿತ್ತು. ಇದು ರಿವರ್ಸ್‌ ಸ್ವಿಂಗ್‌ ಅಲ್ಲ. ಹೊಳಪು ಹೊರಗಿದ್ದು ಚೆಂಡು ಒಳನುಗ್ಗಿದರೆ ಅದು ರಿವರ್ಸ್‌ ಸ್ವಿಂಗ್‌. ಆಸ್ಟ್ರೇಲಿಯಾ ತಂಡ 15-20 ಓವರ್‌ಗಳಲ್ಲೇ ಚೆಂಡನ್ನು ರಿವರ್ಸ್‌ ಸ್ವಿಂಗ್ ಮಾಡುತ್ತಿತ್ತು,” ಎಂದು ಅಲಿ ತಮ್ಮ ಯೂಟ್ಯೂಬ್‌ ಕಾರ್ಯಕ್ರಮದಲ್ಲಿ ವಿವರಿಸಿದ್ದಾರೆ.
ಅಂಪೈರ್‌ಗಳಿಗೆ ಕಣ್ಣಿಲ್ಲವೇ?
ಆಸ್ಟ್ರೇಲಿಯಾ ಬೌಲಿಂಗ್‌ ಮಾಡುವಾಗ 16ನೇ ಓವರ್‌ನಲ್ಲಿ ಚೆಂಡು ಸ್ವರೂಪ ಕಳೆದುಕೊಂಡ ಕಾರಣ ಆನ್‌ಫೀಲ್ಡ್‌ ಅಂಪೈರ್‌ ರಿಚರ್ಡ್‌ ಕೆಟಲ್‌ಬರ್ಗ್ ಹೊಸ ಚೆಂಡು ತೆಗೆದುಕೊಂಡರು. ನಂತರ ಆಸ್ಟ್ರೇಲಿಯಾದ ಅಸಲಿ ಆಟ ಶುರು ಮಾಡಿತ್ತು ಎಂದು ಅಲಿ ಹೇಳಿದ್ದಾರೆ.
“16, 17 ಮತ್ತು 18ನೇ ಓವರ್‌ ಗಮನಿಸಿ. ವಿರಾಟ್‌ ಕೊಹ್ಲಿ ಔಟಾದಾಗ ಚೆಂಡಿನ ಹೊಳಪನ್ನು ಗಮನಿಸಿ. ಮಿಚೆಲ್‌ ಸ್ಟಾರ್ಕ್‌ ಚೆಂಡಿನ ಹೊಳಪು ಹೊರಗಿರುವಂತೆ ಹಿಡಿದು ಎಸೆದಿದ್ದರು. ಆದರೆ, ಚೆಂಡು ವಿರುದ್ಧ ದಿಕ್ಕಿಗೆ ಸ್ವಿಂಗ್‌ ಆಗಿತ್ತು. ಜಡೇಜಾ ಆನ್‌ ಸೈಡ್‌ ಆಡಿದ ಹೊಡೆತಗಳಲ್ಲಿ ಚೆಂಡು ಪಾಯಿಂಟ್‌ ದಿಕ್ಕಿಗೆ ಹಾರುತ್ತಿತ್ತು. ಅಂಪೈರ್‌ಗಳಿಗೆ ಕಣ್ಣಿಲ್ಲವೇ? ಈ ಸರಣಿ ಸಂಗತಿಗಳು ಅಲ್ಲಿ ಕುಳಿತವರ ಗಮನಕ್ಕೆ ಬರಲಿಲ್ಲವೇಕೆ? ಎಂಬುದು ಆ ದೇವರೇ ಬಲ್ಲ,” ಎಂದಿದ್ದಾರೆ.
“ಪೂಜಾರ ಔಟಾಗಿದ್ದನ್ನು ಗಮನಿಸಿ. ಔಟ್‌ ಸ್ವಿಂಗ್‌ ಎಸೆತವು ಒಳನುಗ್ಗಿತ್ತು. ಬಿಸಿಸಿಐ ಅಷ್ಟು ದೊಡ್ಡ ಕ್ರಿಕೆಟ್‌ ಬೋರ್ಡ್‌ ಆಗಿ, ಇದನ್ನು ಗಮನಿಸಿಲ್ಲ ಎಂದರೆ ಕ್ರಿಕೆಟ್ ಬಗ್ಗೆ ಅವರು ಗಂಭೀರವಾಗಿಲ್ಲ ಎಂದರ್ಥ. ಭಾರತ ತಂಡ ಫೈನಲ್ ತಲುಪಿದೆ ಅಷ್ಟೇ ಸಾಕು ಎಂಬ ಸಂತೃಪ್ತಿಯಲ್ಲಿದ್ದಂತ್ತಿದೆ. ಚೆಂಡು 15-20 ಓವರ್‌ಗಳಲ್ಲಿ ರಿವರ್ಸ್‌ ಸ್ವಿಂಗ್‌ ಆಗುತ್ತದೆಯೇ? ಅದರಲ್ಲೂ ಡ್ಯೂಕ್ ಚೆಂಡುಗಳು. ಕೂಕ್ಕಾಬುರ ಚೆಂಡು ರಿವರ್ಸ್‌ ಸ್ವಿಂಗ್‌ ಆಗುತ್ತದೆ ಎಂಬುದು ನನಗೆ ತಿಳಿದಿದೆ. ಆದರೆ, ಡ್ಯೂಕ್‌ ಚೆಂಡುಗಳು ಕನಿಷ್ಠ 40 ಓವರ್‌ಗಳ ನಂತರವೇ ರಿವರ್ಸ್‌ ಸ್ವಿಂಗ್‌ಗೆ ನೆರವಾಗುತ್ತದೆ,” ಎಂದು ಬಸಿತ್‌ ವಿವರಿಸಿದ್ದಾರೆ.