ಉಪ್ಪು, ಸಕ್ಕರೆಯಲ್ಲೂ ಪ್ಲಾಸ್ಟಿಕ್‌ ಕಣ ಪತ್ತೆ

ಹೊಸದಿಲ್ಲಿ: ಭಾರತದಲ್ಲಿ ಮಾರಾಟವಾಗುವ ಎಲ್ಲಾ ಬ್ರಾಂಡ್‌ಗಳ, ಎಲ್ಲಾ ಬಗೆಯ ಉಪ್ಪು ಹಾಗೂ ಸಕ್ಕರೆಯಲ್ಲಿ ಪ್ಲಾಸ್ಟಿಕ್ ಕಣಗಳಿರುತ್ತವೆ (ಮೈಕ್ರೊಪ್ಲಾಸ್ಟಿಕ್‌) ಎಂದು ಟಾಕ್ಸಿಕ್ಸ್‌ ಲಿಂಕ್‌ ಎಂಬ ಪರಿಸರ ಸಂಶೋಧನಾ ಸಂಸ್ಥೆಯ ಅಧ್ಯಯನದಿಂದ ಬಹಿರಂಗವಾಗಿದೆ. ‘ಉಪ್ಪು ಮತ್ತು ಸಕ್ಕರೆಯಲ್ಲಿ ಪ್ಲಾಸ್ಟಿಕ್‌ ಕಣಗಳು’ ಎಂಬ ಶೀರ್ಷಿಕೆಯಲ್ಲಿ ಈ ಸಂಸ್ಥೆ ವ್ಯಾಪಕ ಅಧ್ಯಯನ ನಡೆಸಿದೆ.ಟೇಬಲ್‌ ಸಾಲ್ಟ್‌, ಕಲ್ಲುಪ್ಪು, ಕಚ್ಚಾ ಉಪ್ಪು ಮಾದರಿಗಳನ್ನು ತೆಗೆದುಕೊಂಡು ಅಧ್ಯಯನ ನಡೆಸಲಾಗಿದೆ. ಸ್ಥಳೀಯ ಮತ್ತು ಆನ್‌ಲೈನ್‌ ಮಾರುಕಟ್ಟೆಯಲ್ಲಿ ಖರೀದಿಸಿದ 5 ಬಗೆಯ ಸಕ್ಕರೆಯನ್ನು ಕೂಡ ಪರೀಕ್ಷೆಗೊಳಪಡಿಸಲಾಯಿತು. ಎಲ್ಲದರಲ್ಲೂ ಫೈಬರ್‌, ಹರಳು ಮತ್ತು ಚೂರುಗಳ ರೂಪದಲ್ಲಿ ಪ್ಲಾಸ್ಟಿಕ್‌ ಕಣಗಳಿದ್ದವು. ಇವುಗಳ ಗಾತ್ರ. 1 ಮಿಮೀ ನಿಂದ 5 ಮಿಮೀ ವರೆಗೆ ಇತ್ತು. ಆಯೋಡಿನ್‌ಯುಕ್ತ ಉಪ್ಪಿನಲ್ಲಿ ತೆಳುನಾರು ಮತ್ತು ಪೊರೆ ರೂಪದಲ್ಲಿ ಹೆಚ್ಚಿನ ಪ್ರಮಾಣದ ಪ್ಲಾಸ್ಟಿಕ್‌ ಕಂಡು ಬಂದಿದೆ.ಅಧ್ಯಯನದ ಉದ್ದೇಶ” ಪ್ಲಾಸ್ಟಿಕ್‌ ಕಣಗಳ ಕುರಿತು ಈಗ ಅಸ್ತಿತ್ವದಲ್ಲಿರುವ ವೈಜ್ಞಾನಿಕ ದತ್ತಾಂಶಗಳಿಗೆ ಇನ್ನಷ್ಟು ಕೊಡುಗೆ ನೀಡುವುದು ನಮ್ಮ ಅಧ್ಯಯನದ ಉದ್ದೇಶವಾಗಿತ್ತು,” ಎಂದು ಟಾಕ್ಸಿಕ್ಸ್‌ ಲಿಂಕ್‌ ಸ್ಥಾಪಕ-ನಿರ್ದೇಶಕ ರವಿ ಅಗರ್ವಾಲ್‌ ಹೇಳಿದ್ದಾರೆ. ”ಇದರಿಂದ ಪ್ಲಾಸ್ಟಿಕ್‌ ಬಳಕೆ ಸಮಸ್ಯೆಯ ತೀವ್ರತೆಯನ್ನು ಮನಗಂಡು ಅದನ್ನು ಪರಿಹರಿಸಲು ಮುಂದಾಗಬಹುದು. ಇದಕ್ಕೆ ತಕ್ಕ ಕ್ರಿಯಾ ಯೋಜನೆ ಕೈಗೊಳ್ಳುವ ತುರ್ತನ್ನು ಮನದಟ್ಟು ಮಾಡುವುದು, ಪ್ಲಾಸ್ಟಿಕ್‌ ಕಣಗಳ ಅಪಾಯವನ್ನು ತಿಳಿಸಿ ಅದನ್ನು ನಿವಾರಿಸಲು ಮುಂದಾಗುವಂತೆ ಮಾಡುವುದು ನಮ್ಮ ಗುರಿ,” ಎಂದು ಅವರು ತಿಳಿಸಿದ್ದಾರೆ.ಟಾಕ್ಸಿಕ್ಸ್‌ ಲಿಂಕ್‌ ಅಸೋಸಿಯೇಟ್‌ ನಿರ್ದೇಶಕ ಸತೀಶ್‌ ಸಿನ್ಹಾ ಮಾತನಾಡಿ ”ನಮ್ಮ ಅಧ್ಯಯನವು ಎಲ್ಲಾ ಉಪ್ಪು ಮತ್ತು ಸಕ್ಕರೆ ಮಾದರಿಗಳಲ್ಲಿಗಣನೀಯ ಪ್ರಮಾಣದಲ್ಲಿ ಪ್ಲಾಸ್ಟಿಕ್‌ ಕಣಗಳು ಇರುವುದನ್ನು ಪತ್ತೆ ಮಾಡಿದೆ. ಇದು ಮನುಷ್ಯರ ಆರೋಗ್ಯದ ಮೇಲೆ ಉಂಟು ಮಾಡುವ ದೀರ್ಘಕಾಲೀನ ಪರಿಣಾಮಗಳ ಕುರಿತು ತಕ್ಷಣ ಸಂಶೋಧನೆ ಮಾಡುವ ಅಗತ್ಯವನ್ನು ಪ್ರತಿಪಾದಿಸುತ್ತದೆ,” ಎಂದಿದ್ದಾರೆ.